Gebedsfokus
Gebedsfokus - 2010
GEBEDSFOKUS
Januarie 2010
Wat is gebed?
Dit is die groot vraag op baie mense se lippe. Natuurlik is dit gesprek met God! Maar waarom is dit dan so moeilik? Ek dink dit is omdat ons daarvan ingewikkelde formules gemaak het. Daar is nie ‘n verskil tussen praat met mekaar en praat met God nie, behalwe dat ons die voorreg het om met die lewende God te mag praat. Gebed is vir God belangrik omdat dit uitloop op intimiteit.
God wil hê dat die verhouding tussen Hom en sy kinders ’n liefdesverhouding moet wees. Jy kan egter nie díe verhouding laat groei as jy nie tyd met Hom spandeer nie. God se woord sê in Spreuke 15:8 dat die gebed van opregtes Hom gelukkig maak. Doen moeite om met God te praat, hoe meer jy ’n Sy teenwoordigheid kom, hoe meer sal jy verander om Sy beeld te word. BID!! Dit is die wonderlikste voorreg wat enige mens te beurt kan val.
Die wese van gebed
- Gebed is eerstens ’n verhouding met God. Dit gaan in die eerste plek om God self en daarom is daar elemente van:
- aanbidding
- lofprysing
- verwondering
- skuldbelydenis
- stil wees voor God
- luister
- Hier word gepraat van die werk van gebed as ons dink aan die volgende
- voorbidding
- versoeke
- om in te tree
- smeking
In die Bybel is soveel uitsprake oor gebed:
- Rom. 15:30 “Ek versoek jul dringend … stry saam met my deur vir my te bid”.
- 2 Kor. 1:11 “Daartoe werk julle mee deur vir ons te bid.”
- Kol. 4:12 “Epafras … bid altyd ernstig vir julle dat julle staande mag bly”
- Kol. 1:9 “Daarom…. hou ons ook nie op om vir julle te bid nie”.
- 1 Tim. 2:1 “Ek dring daarop aan dat daar in die eerste plek met smeking, voorbidding en danksegging gebid moet word vir alle mense.”
Ons kan die vraag vra:
- Waarom is die kerk so kragteloos?
- Waarom is daar soveel doodsheid in ons lewe?
- Waarom kom soveel mense tot geloof maar die groei tot geestelike volwassenheid ontbreek?
Jak.4:2 sê: “Julle het nie omdat julle nie bid nie, julle bid en ontvang nie, omdat julle verkeerd bid…”
Meer doelgerigte, intelligente en volhardende gebed sal meer geestelike vrugte oplewer.
- Deur GEBEDSFOKUS wil ons bewus gemaak word van wyer gebed as net ons persoonlike grense.
- Mag GEBEDSFOKUS tot groot seën in jou lewe wees en mag dit jou gebedsgrense verskuif.
- Die eerste uitgawe sal DV in Februarie 2010 verskyn.
