“Waarom Gawebediening?”

Dis 'n baie redelike vraag. In die meeste gemeentes is daar al menige kere oor gawes gesels, en by baie is dit dus nie iets nuuts in “gemeentewees” nie. “Gawe-vraelyste” het amper mode geword in die kerk. Steeds was daar egter 'n groot leemte! Baie lidmate sal vir jou sê dat hulle voorheen alreeds 'n vraelys voltooi het en dus “weet ek wat my gawes is.” En tog word die praktiese uitleef van gawes bitter selde in gemeentes gesien soos dit behoort te funksioneer! Maar Netwerk is anders - juis omdat Netwerk meer as bloot 'n kursus is.

As die Netwerk-opleidingsproses van die Gawebediening getrou gevolg word, lewer dit positiewe resultate! Die lidmaat word begelei om sy/haar gawes te ontdek, maar dit is nie die kern van die gawebediening nie.. Die belangrikste is dat die lidmaat diens in die plaaslike gemeente moet lewer (waarin sy/haar gawes toepaslik aangewend word) . Dit is dus 'n “diensbaarheidsproses”.

Dis veel meer as net kopkennis

“Die regte mense, op die regte plekke, vir die regte redes!”

Hierdie stelling is sentraal binne die Netwerk-proses. Let mooi op: dit sê nie “Die egte mense dra kennis van hul plekke” nie! Ons sien hulle werksaam in hul plekke! En daarom is hierdie kursus bloot die eerste tree op 'n pad van diensbaarheid - 'n lewenslange pad wat ons almal as gelowiges saam behoort te loop. Gebruik Netwerk slegs as kursus om kennis uit te brei - en dis heel moontlik ook al wat sal gebeur. En diensbaarheid sal nie in waarde toeneem in die gemeente nie.

Netwerk as kursus se omvattendheid en Bybelse grondslag het my van dag een af beïndruk. Maar dit is nie die Netwerk kursus wat ons passie vir die plaaslike kerk so aanvuur nie. Ons passie word grootliks aangevuur deur die vrywilligers wat na vore gekom het, en met 'n gesindheid van '“n lap oor die arm” kom sê het: “Ek is hier om te dien.”

Netwerk se vrug kom deur mense, want kerk is daar vir mense. Dis die mense wat saam in hierdie droom van hoe 'n kerk kan werk, glo en daaraan help bou, wat die bewys van Netwerk se sukses is. Dankie ook vir die leiers en lede van ons gemeente wat bereid is, om te waag met 'n nuwe manier van kerkwees. Dit gebeur omdat Jesus Koning is.